పది బోధించే ఉపాధ్యాయులకు సెలవులు లేవు.అసాధారణ పరిస్థితుల్లో మాత్రమే ఇవ్వాలి విద్యార్థులను సన్నద్ధం చేయడంపై మార్గదర్శకాలు విడుదల

పదో తరగతికి బోధించే ఉపాధ్యాయులకు పరీక్షలయ్యే వరకు సెలవులు ఇవ్వొద్దని పాఠశాల విద్యాశాఖ కమిషనర్ సురేష్ కుమార్ ఆదేశాలు జారీ చేశారు . అసాధారణ పరిస్థితుల్లో తప్ప , సెలవులు మంజూరు చేయొద్దని జిల్లా విద్యాధికారులకు సూచించారు . ఉపాధ్యాయులు లేకుండా ఏ తరగతి ఉండకూడదని పేర్కొన్నారు . పదో తరగతి పరీక్షలకు విద్యార్థులను సన్నద్ధం చేయడంపై మార్గదర్శకాలు విడుదల చేశారు . మొదటిసారిగా పదిలో ఏడు పేపర్ల విధానం ప్రవేశపెట్టామని , పాఠ్య ప్రణాళికపై విద్యార్థులకు సమాచారం ఇవ్వాలని సూచించారు . విద్యార్థులందరూ ప్రతిరోజు హాజరయ్యేలా చూడాలని , అన్ని సబ్జెక్టులను కవర్ చేసేలా రోజువారీ ప్రణాళిక చేసుకోవాలని ఆదేశించారు . యూట్యూబ్ ఛానల్స్ , దీక్ష పోర్టల్లో ఉండే మెటీరియల్ను వినియోగించుకొని , పునశ్చరణ నిర్వహించాలని సూచించారు .

ప్రత్యేక శ్రద్ధ .చదువులో వెనుకబడిన వారిని సబ్జెక్టుల వారీగా గుర్తించాలి . బ్లూప్రింట్ ప్రశ్నపత్రాల ఆధారంగా ప్రత్యేక ప్రణాళికను రూపొందించాలి . ఇంటి వద్ద చదువుకోవడం , పిల్లలు కలిసి చదువుకోవడం చేయించాలి . పరీక్షల్లో ఉత్తీర్ణత సాధించేలా విద్యార్థులకు మద్దతు ఇచ్చేందుకు వారిని ఉపాధ్యాయులు దత్తత తీసుకోవాలి .  గతేడాది పదోతరగతి ప్రశ్నపత్రాలను సేకరించి , వాటితో ప్రాక్టీస్ చేయించాలి . ఒత్తిడి తొలగించేందుకు వ్యక్తిత్వ వికాసం తరగతులు నిర్వహించాలి . సాధారణ , వెనుకబడిన , చదువులో ముందుండే వారికి సమాన ప్రాధాన్యం ఇవ్వాలి.

ఇళ్ల వద్ద చదువుకునే వాతావరణం కల్పించేందుకు తల్లిదండ్రులతో మాట్లాడాలి . చదువులో వెనుకబడిన వారిని విమర్శించవద్దు . పాఠశాల సమయంలో ఉపాధ్యాయులు బయటకు వెళ్లకూడదు . తరగతి సమయంలో ఫోన్లు వినియోగించవద్దు .